Isidorus, De ecclesiasticis officiis, 1, 15, 4.
| 1 | Nam cum dicimus: Sanctificetur nomen tuum, Adveniat regnum tuum, Fiat voluntas tua, sicut in coelo, et in terra; hic quidem ista tria inchoantur; sed in illa vita sperantur, ubi sanctificatio Dei, et voluntas, et regnum in sanctis suis immortaliter permanebit. |
| 2 | Iam vero panis quotidianus, qui vel animae, vel carni tribuitur, hic exposcitur; hic etiam post subsidium cibi venia de exemplo fraternae indulgentiae postulatur; hic, ne in peccati tentationem incidamus, exposcimus. |
| 3 | Hic, post omnia, ut a malis liberemur, Dei auxilium imploramus. |
| 4 | Illic autem nihil istorum est. |