Isidorus, De ecclesiasticis officiis, 1, 1, 1

1	Primum a sancto Petro Ecclesia in Antiochia est fundata, ibique primum nomen Christianorum per eius est praedicationem exortum, sicut Actus apostolorum testantur (Act. XI, 26).
2	Vocantur autem Christiani, derivato vocabulo ex nomine Christi.
3	Nam sicut ex Iudae nomine vocabulum traxerunt Iudaei, a quo in illa gente regiae stirpis dignitas claruit, ita a Christo Christianae genti nomen inhaesit.
4	Cuius et in gentibus et in Iudaeis praerogativa est dignitas potestatis.
5	Ecclesia autem vocatur proprie, propter quod omnes ad se vocet, et in unum congreget.
6	Catholica autem ideo dicitur, quia per universum mundum est constituta, vel quoniam catholica, hoc est, generalis in ea doctrina est, ad instructionem hominum de visibilibus atque invisibilibus, coelestium ac terrestium; vel propter quod omne hominum genus trahit ad se ad pietatis subiectionem, tam principum quam etiam qui principantur, oratorum et idiotarum; vel propter quod generaliter curat omnium peccata, quae per corpus et animam perficiuntur.