Ioannes Saresberiensis, Polycraticus, 6, Caput III. [De militibus gloriosis, qui militiae inutilessunt.]
| 1 | Erubescent forte milites gloriosi, et qui Thrasonem comicum potius vita et moribus, quam professione et nomine repraesentant, haec armatae militiae munia, quae non tam (ut eis videtur) disciplinam redolet militarem, quam ignominiosae servitutis angustias. In eo namque militarem gloriam constare opinantur, si nitidiori splendeant habitu, ut lineas suas vestesve sericas sic perstringant et torqueant, ut quasi cutem cerussatam, aliisve fucis obnoxiam, carni faciant cohaerere, si gradariis equis insideant mollius, si calamistrati, curative Acteo non cedant Apollini, et deliciis sint magis quam virtute praesignes. |
| 2 | Eorum si forte construxeris aciem, castrum Thaidis quam Hannibalis tutius expugnabis. Quisquis eorum in aula iactantior est, cum ad praelii discrimen acceditur, Lacones duce Sanga turmatim praemittet ad pugnam, novissimos praesidii causa subsequens, cum funditoribus aliisque, qui in hostem tela eminus mittere quam manum conserere volunt. |
| 3 | Cum vero sine vulnere et cicatrice (quod frequentius evenit) domum redeunt, Tunc exhausta canunt praelia Marte gravi. Illic Aeacides, illic tendebat Achilles. Et pingunt fluido Pergama tota mero. Et quisque mortes mille circa tempora sua errasse gloriatur. Exinde gloriam eorum ferre non poteris. Fabula haec in annum centesimum protelabitur. Filii quoque qui nascentur et exsurgent, enarrabunt filiis suis. |
| 4 | Si hastas aliquot, quas ad modum canabis fragiles, diligens inertia procuravit, quis fregerit, si aurum, minium, colorve alius, quocunque ictu, casuve a clypeo excidit, hoc garrula lingua, si licuerit, memoriale facient in saeculum saeculi. Isti primos recubitus habent in coenis, et quidquid Renatus noster de re militari tradiderit, epulantur, si fortuna permittit, quotidie splendide, omnemque laborem et exercitationem, quem non invincibilis necessitas ingerit, cane et angue deterius fugiunt, et quidquid imminet difficultatis, reiiciunt in subiectos. |
| 5 | Inerim clypeos sic inaurant, sic exornant omnia instrumenta castrorum, ut quemlibet eorum non tam cultorem quam praesidem Martis credas. Cuius istorum aut clypeus detrahatur aut galea, spolia eius ipsum Martem poterunt honorare. |