Ioannes Saresberiensis, Epistulae, EPISTULA CCCXXV.AD PHILIPPUM DECANUM ET CAPITULUM S. MARTINI. [A. D. 1176.]
| 1 | IOANNES, divina dignatione et meritis sancti Thomae, Carnotensis Ecclesiae minister humilis, PHILIPPO decano Beati Martini totique capitulo in Domino, salutem. |
| 2 | Universitatem vestram ignorare non credimus quod controversiam, quae inter homines de Castro Novo Beati Martini et R. nobilem ecclesiae vestrae thesaurarium vertitur super quibusdam iuramentis vel fidei praestatione quam occulte inter se dicuntur praedicti homines praestitisse in depressionem iuris praedictae ecclesiae, dominus papa nobis commisit audiendam, et, omni contradictione et appellatione cessante, fine debito terminandam. |
| 3 | Nos itaque secundum apostolicum mandatum et de consilio virorum religiosorum et prudentium procedentes, et sufficientibus testibus omni exceptione maioribus rei cognita veritate, sententiam excommunicationis in praedictos homines, tum propter eorum manifestam contumaciam, tum propter praedictae coniurationis probatam testibus infamiam, auctoritate apostolica qua fungimur in hac parte protulimus; illos vero quos audivimus esse principes factionis nominatim vinculo excommunicationis innodavimus; in reliquos vero omnes, qui sunt eiusdem coniurationis complices, non ex nomine, sed in omnes sententiam excommunicationis protulimus generalem. |
| 4 | Vobis itaque eorum nomina qui nominatim excommunicati sunt litteris nostris expressa transmittimus: Reginaldus Meschini, Petrus de Montebruis, Nicolaus Engelardi, Petrus Auberti, Paganus Gastinelli, Ioannes Ermerardi, Radulfus de Fulchis, Radulfus Thomae, Gilo Balduini, Petrus Aimeri, Gilo Thomae, Gilo Senoreti, Bartholomaeus de Lochis, Petrus de Savoneriis, Harduinus Pelliparius, Petrus Chivittonus, Reginaldus Goslani, Iuguelmus Cordoanarius, Hamericus Epuliardi, Sancio Emenardi, Gaufridus de Cormeriaco, Bartholomaeus Fromaudi, Iocelinus Pelliparius, Herbertus de Carnoto, Bartholomaeus Attatei, Thomas de Ambasia. |
| 5 | Inde est quod universitati vestrae auctoritate apostolica mandamus ut illos quos nominatim excommunicavimus excommunicatos ex nomine nuntietis, et generalem excommunicationem quam protulimus in reliquos qui praedictae coniurationis sunt complices, in omnes generaliter promulgetis, et in ecclesia vestra a sacerdotibus minorum altarium ecclesiae praedictos excommunicatos tam ex nomine quam in genere faciatis frequenter et solemniter nuntiari, vel eos a divinis officiis cessare compellatis. |