Ioannes Saresberiensis, Epistulae, EPISTULA CCCXXIV.CAPITULI CARNOTENSIS AD EUMDEM. [A. D. 1176.]
| 1 | Venerabili domino suo et Patri, IOANNI Dei gratia Carnotensi electo, pastoralis curae sollicitudinem gerere ad salutem. |
| 2 | Quod natum est ex carne, caro est; et quod natum est ex spiritu, spiritus est. Hinc est quod magnificat anima nostra Dominum, et in Deo spiritus noster exsultavit, quia vos nobis in pastorem electum non revelavit caro et sanguis, sed Pater noster qui in coelis est, visitans nos Oriens ex alto. Sane tam dissona hominum vota, tot varias mentium voluntates, adunare non potuit nisi spiritus unitatis, adeo ut indubitanter sit evidens eum quem spiritus revelavit, coelitus destinatum. |
| 3 | Curiae coelesti gaudium intulisse credimus, quod Beatae Virginis Ecclesia, per Spiritum sanctum concipiens, dilectum Deo et hominibus pastorem germinavit. Acclamantibus itaque omnium votis desideratum sibi postulat, et ad dilectum et ad electum sibi incunctanter aspirat Carnotensis Ecclesia, sponsique desiderio iam languescens: Osculetur me, inquit, osculo oris sui [Cant. I]. Urgeat amor Christi eum qui regis filiae desideratur amplexibus, et stimulis salutaribus compungatur qui ad Dei filios propagandos Christi gener eligitur. |
| 4 | Erubescat regnum coelorum solus ingredi, cui divini germinis pompa gloriosa promittitur; et qui coronam auream creditur meruisse, gloriosi labore officii mereatur aeternam. Mittimus ergo ad vos ex capitulo nostro personas spectabiles, decanum videlicet, cantorem et cancellarium, qui universitatis nostrae mentem vobis offerant, et personam vestram postulantes, vestri adventus desiderium viva nobis voce denuntient. |