| 1 | Domino GRATIANO IOAN. [Edit. Paris., Idem Gratiano notario domini papae.]. |
| 2 | Veritas Christi, quam in vobis esse prae caeteris qui missi fuerant in negotio sancti Thomae mundus agnovit, mihi confidentiam praestat, ut eos quos praefato martyri devotos esse constat dilectioni vestrae secure audeam commendare. Horum unus est et numerandus in primis, venerabilis vir R. Winton. electus, quondam Pictavens. archid. pupillorum pater, et moerentium consolator, fautor ecclesiasticae libertatis, iustitiae cultor, et iniquitatis adversarius, quantum pro tempore licet, imo ulterius, ut in eum saepe pro Domino contendentem non sine periculo malorum impetus excandescat. Homo devotus est apostolicae sedi et cuius familiaritas honori vestro valeat inservire. |
| 3 | Et quidem desiderat ut sedulitas eius vobis officiosa possit esse in aliquo, magnique censebit instar muneris si ei quidquam iniungere voluerit dilectio vestra. Quia ergo secundum Deum ad regnum Ecclesiae salubriter et ad consolationem multorum vocatus est charitatis vestrae genibus provolutus quantacunque possum instantia supplico, quatenus et personam eius et causam habeatis propensius commendatam, et sic ipsius promoveatis negotia, sicut expediendas novistis Anglicanae Ecclesiae necessitates. |
| 4 | Se enim totum, ut indubitata spes est, Christi devovit obsequio, paratus etiam propriam animam pro Ecclesia victimare. Valete. |