Ioannes Saresberiensis, Epistulae, EPISTULA CCCXIV.AD HUMBALDUM OSTIENSEM EPISCOPUM. [A. D. 1173.]
| 1 | Venerabili domino et Patri charissimo HU. De gratia Ostiensi episcopo, I. de Sar., salutem et plenae devotionis obsequia. |
| 2 | Vererer tantam alloqui maiestatem, nisi me vestra benignitas relevaret, et animaret ad verbum illius verae charitatis recordatio quam prae caeteris fere mortalibus ad sanctum tunc confessorem, nunc gloriosum martyrem habuistis, cui me pro libertate Ecclesiae coexsulare divina fecit misericordia. Hac fiducia roboratus audeo sanctitati vestrae attentius commendare virum procul dubio commendabilem. Ric. Winton. electum, cuius facultates sunt egenorum subsidia, ecclesiarum consolatio. |
| 3 | Cuius potestas iniquitatis exterminatio est, et iustitiae firmamentum. Is tanta affectione amicum vestrum gloriosum martyrem Christi diligit, ut se illius constituerit servum, ut alumnos qui multi ad eum confluunt in suis necessitatibus consoletur, et eum pro viribus studeat imitari. Sanctitatis itaque vestrae pedibus provolutus meo et eorum qui nobis coexsulaverunt nomine precor attentius, quatenus negotia eius sic gratia vestra promoveat, ac si eum videretis sancti Thomae negotiis insudantem. |
| 4 | Nam et ipse sua omnia, imo et se ipsum, gloriosissimo martyri, quem patronum praeelegit, mente devotissime consecravit. |