Ioannes Saresberiensis, Epistulae, EPISTULA CCXXIX.AD MAG. RAIMUNDUM ECCLES. PICTAV. CANCELL. [A. D. 1167.]
| 1 | Magistro RAIMUNDO Pictaviensis Ecclesiae cancellario, IOANNES, salutem, et pro voto successus. |
| 2 | Si salutationis antiquae mutatur species, non imputetur praesumptioni, sed illis qui fidem persequuntur, qui charitatis munus impediunt: qui veritati moliuntur insidias. Sperabant Cantuarienses in adventu cardinalium se laboris et doloris solatium recepturos; sed ut timeo, frustra: nam, ut pro animi mei loquar sententia, unus eorum plus quam expedit hominem timet, alter Dominum non veretur. |
| 3 | Ita enim, ut dicitur, hactenus in causa Domini processerunt, ac si ille coram rege constitutus ad includendam veritatem secum attulisset carcerem Tullianum; hic, ad compedienda iura legum et canonum, vincula Petri. Francorum haec de eis sententia est. Res tibi latius innotescet ex litteris quas meo Ioanni plenius exaravi. Unum scio quod adventus eorum quibusdam amicis tuis quietem abstulit, labores et sollicitudines attulit, et eos sumptibus attenuavit quos utinam non fecissent incassum! |
| 4 | De caetero quoties opportunum fuerit, sollicita Sarracenum ut petitioni meae satisfaciat, et transmittat mihi librum beati Dionysii de Ecclesiastica Hierarchia et divinis nominibus, quos, sicut apud beatum Dionysium didici, nuper transtulit. Valete. |