Ioannes Saresberiensis, Epistulae, EPISTULA CCXXIII.AD MAGISTRUM RAIMUNDUM. [A. D. 1167.]
| 1 | Magistro RAIMUNDO. |
| 2 | Quid me tandiu silere coegerit, in quo statu versatus sum, vobis ex litteris domino Pictaviensi missis facile innotescet. Unde ad reliqua necessitatis meae progrediens attentius precor, quatenus conditione mea diligenter inspecta, ex omnibus circumstantiis personarum et causae et temporis, rescribere placeat quid potissimum videatur, hoc in praeelectione consilii observato, ut semper honestas utilitati praeiudicet. |
| 3 | Et, si domino episcopo, et vobis, et magistro Laurentio visum fuerit ut mihi et exsulibus aliis Christi procuretur facultas secura legatos adeundi, eam nobis desidero procurari: ita tamen ut (antequam illos adeam) domini episcopi et vestro, et M. Laurentii, si tamen ab Anglia rediit, super negotiis gerendis sim informatus consilio. Varius autem rumor est aliis asserentibus cardinales fideliter pro Ecclesia Dei laboraturos: aliis dicentibus quod proposuerunt distrahere Ecclesiae libertatem, et evacuare iustitiam causae nostrae pro pecunia, quam tamen non licet mittere in corbonam, quia pretium sanguinis est. |
| 4 | Erat itaque diligentiae vestrae rescribere, quod de consilio eorum et statu domini regis et curiae habueritis exploratum, et quae circa dominum episcopum et vos agantur, fidelius intimare. Precor etiam ut mihi remittatis, si quid magister Ioannes rescripsit, petitionibus meis, aut si nondum rescripsit, detis operam ut rescribat. Valete. |