| 2 | In se ipsum, teste Anania, provocat sententiam mortis, qui Spiritum sanctum, merito virtutum, successionis gratia, praerogativa sedis habitantem in vobis, aliquo mendacii fuco circumvenire praesumit, praesertim cum in dispendium iuris, et alterius laesionem mendax precator invigilet. Porro lator praesentium Nicolaus a venerabili fratre nostro David Menevensi episcopo, archidiaconatu, quem canonice habebat, contra omnem reverentiam iuris absens spoliatus, inauditus, non conventus, occasione litterarum quas quidam Iordanus, forte vobis incognitus, falsis precibus, non sine admiratione totius Anglicanae Ecclesiae a vestra clementia impetravit. |
| 3 | Hic est, Pater optime, hic est ille publice periurus, homicidii ex praecedenti insimulatione publica respersus infamia, quem, ob crimen falsi in apostolicis apicibus commissi, sanctus decessor vester Eugenius officio et beneficio ecclesiastico condemnavit, qua ille prostratus sententia, exquisitis ignotarum gentium angulis latuit, donec praedictum patrem rebus humanis cognovit exemptum. Supplicamus itaque maiestati vestrae, quatenus latoris praesentium inspecta iustitia et miserabili paupertate, quod in eum enormiter factum est, misericorditer corrigatis, et eo restituto causam iubeatis per legitimos tramites suo marte discutere, si tamen decessoris vestri sententiam evacuandam esse decernitis, et homini iam damnato actionem potius deberi quam poenam. |