| 1 | Domino papae ALEXANDRO. |
| 2 | Venerabilis frater noster Robertus Bathoniensis episcopus dilecto filio nostro, fideli vestro Willelmo Cumin ecclesiam de Cerda restituit, iuxta mandatum misericordiae vestrae, quo praeceperatis eamdem sibi, appellatione remota, restitui, si ipsum Dunelmensi ecclesiae plene satisfecisse constaret. Dicitur autem clericus quidam nomine A. ut hoc beneficium clementiae vestrae infirmet ad sedem apostolicam proficisci. |
| 3 | Nos itaque quas possumus maiestati vestrae pro W. preces porrigimus supplicantes, ut quod ei misericorditer conferre dignata est bonitas vestra, fideliter conservare dignetur, et ut ipsum in petitionibus iustis clementer audiatis. |