Ioannes Saresberiensis, Epistulae, EPISTULA XLV.AD ABBATES WAULIAE.
| 1 | Dilectis in Domino filiis abbatibus universis, de sinu monasterii Wauliae procreatis salutem. |
| 2 | Commonuimus scripto nostro fratres illos, qui a sui abbatis obedientia recedentes, vocem alterius, cui nullo professionis vinculo tenebantur astricti, audierunt, et cum eo a congregatione et unitate monasterii sui declinaverunt. Illi vero nihilominus, ut dicitur, in schismate persistentes, in contumeliam ordinis vestri et iniuriam capituli Cisterciensis quo ab abbate Wauliae appellatum est, officii nostri admonitione contempta, eumdem abbatem sequi non desistunt. |
| 3 | Unde charitatem vestram praesentium auctoritate sollicitare compellimur, ut venerabilem amicum nostrum Philippum abbatem Eleemosynae, cuius, ut dicitur, armantur consilio, diligentius conveniatis, ut fratrum illorum inobedientiam nequaquam foveat, sed ad Patrem suum, qui eos in Christo dignoscitur genuisse, redire permittat. Eisdem quoque fratribus auctoritate nostra praecipiatis, ut redeant, et matris suae scissuram charitatis vinculo, fructu obedientiae, unitate spiritus studeant resarcire. |
| 4 | Si vero mandati nostri contemptores in schismate suo perseverare maluerint, sententiam, quam in eos abbas suus canonice dederit, ratam habebimus, et auctore Domino in regno Anglorum faciemus inviolabiliter observari. |