Ioannes Saresberiensis, Entheticus, CLXXI Nulla secta sine gratia libera a fastu
| 1 | Quaelibet admittit, si desit gratia fastum |
| 2 | Secta, nec haec arcet parva vel ampla domus, |
| 3 | Non facit, ut sapias, habitus nomenque magistri, |
| 4 | Nec convivarum turba beare potest: |
| 5 | Non caput attonsum, non vestis pulla ve alba |
| 6 | Te trahit ad vitam, gratia sola trahit; |
| 7 | Nam stulti possunt in quavis veste perire, |
| 8 | Redduntur vitae praemia nulla togae. |
| 9 | Oderunt verum, quod honestas sanxit abhorrent |
| 10 | Unde fit, ut caeci praecipitesque ruant. |
| 11 | Excipit infernus pereuntes veste remota, |
| 12 | Nec minuit poenam tetra vel alba suam. |