Ioannes Saresberiensis, Entheticus, CLXIX De triplici obstaculo vitiorum.
| 1 | Ergo tam saevi qua possunt arte repelli |
| 2 | Hostes? aut quid eos cogit inire fugam? |
| 3 | Si timor ante fores, et si pudor atria servet, |
| 4 | Et si castus amor interiora tenet, |
| 5 | Devitat poenam timor officiosus et omne |
| 6 | Quod, nisi praecaveat, posse nocere putat. |
| 7 | Nominis ingenuus maculam pudor arcet odores |
| 8 | Spargit ubique bonos, unde placere queat. |
| 9 | Castus amor rebus sic semper adhaeret honestis, |
| 10 | Quod nec vis maior dissociare potest; |
| 11 | Virtutes locat in castris, sic omnia munit, |
| 12 | Ut nullum possit hostis habere locum |
| 13 | Sed timor in servo, valeat dum poena caveri, |
| 14 | Ad facilem quaestum cedet eritque nocens; |
| 15 | Et famae custos, dum possit culpa latere, |
| 16 | Consentit vitiis absque rubore pudor. |
| 17 | Non sic verus amor, qui casu fidus in omni |
| 18 | Virtutem solam gaudet inesse sibi. |
| 19 | Ob causas varias quaeruntur caetera, virtus |
| 20 | Se contenta sui praemia semper habet, |
| 21 | Omnia virtuti fatalia commoda cedunt, |
| 22 | Virtutis fructus est in amore pio |
| 23 | Sicut casta fidem cupiens servata marito |
| 24 | Coniux declinat et studiosa fugit, |
| 25 | Ne corruptori pateat locus ullus ad ipsam, |
| 26 | Aspectum, risus, munera, verba, iocos |
| 27 | Contemnens, meritum et nomen moechantis abhorret: |
| 28 | Sic omnem culpam sanctus abhorret amor. |