Ioannes Saresberiensis, Entheticus, CXXXVIII De Antipatro, et quare sic dicatur.
| 1 | Presbyteros tanquam Patres populus veneratur. |
| 2 | Et fidei pars est iussa subire Patris, |
| 3 | Iussa subire Patris, praesertim recta iubentis, |
| 4 | Pro quibus expletis vita beata datur. |
| 5 | At ferus Antipater hos persequitur velut hostes |
| 6 | Intentansque dolos undique bella movet, |
| 7 | Hinc illi nomen datur Antipater, quia Patres |
| 8 | Laedit et infligit damna, necemque parat. |
| 9 | Sedulus in saccum pertusum congerit omnes |
| 10 | Christo subtractas, quas male quaerit, opes; |
| 11 | Ecclesiam servire iubet, clerum populumque |
| 12 | Decernit similem iure tenere locum. |
| 13 | Opprimitur clerus, privatur honore sacerdos, |
| 14 | Sed delatoris nomen ubique viget. |
| 15 | Publicus exactor summo praecellit honore, |
| 16 | Gratior ille tamen, qui mala plura facit. |
| 17 | Hi si forte volunt aliquid pervertere, dicunt: |
| 18 | Dedecus hinc regni vertitur, inde decus. |
| 19 | Princeps non cupidus meriti, sed laudis avarus |
| 20 | Praecipuum sine re nomen honoris habet, |
| 21 | Non curat, quid honor, sed quid videatur honestum, |
| 22 | Nec bona vera placent, sed iuvat umbra boni |
| 23 | Sic ratio sub praetextu caecatur honoris, |
| 24 | Vanaque dum petitur gloria, vera fugit. |