Ioannes Saresberiensis, Entheticus, CXXV De Moyse, quod ipse sit fons Scripturarum.
| 1 | Errat Musaeus nimium, Varroque coerrat, |
| 2 | Sed Mosi mentem spiritus almus agit. |
| 3 | Plena sacramentis sic quinque volumina scribit, |
| 4 | Ut sit in historia sensus ubique triplex; |
| 5 | Ut pariter doceat pueros iuvenesque senesque; |
| 6 | Quantum quisque capit, littera cauta docet. |
| 7 | Ubera dat natis, infligit verbera servis |
| 8 | Et facit illorum colla subesse iugo. |
| 9 | Et licet involvat arcanis vera figuris, |
| 10 | Scindit vela tamen, et vetus umbra perit. |
| 11 | Inter philosophos vocat hunc gentilis agrestem, |
| 12 | Et tamen illorum maximus hoc minor est. |
| 13 | Hic Scripturarum fons est et origo piarum, |
| 14 | Quo de principio pagina sacra venit. |
| 15 | Fons aliis, aliis stagnum puteusve profundus; |
| 16 | Inde sitim reprimas, crescit et inde sitis; |
| 17 | Quod satis est, possunt omnes haurire, sed ipsum |
| 18 | Exhaurit plane nemo vel imminuit. |