Ioannes Saresberiensis, Entheticus, CXIX Quid sit ratio viva.
| 1 | Vivit enim ratio, quae per se nota patescit |
| 2 | Aut per se notis semper adesse solet. |
| 3 | Asserit haec sciri, dubitanter caetera tradit. |
| 4 | In quibus ex usu maior habenda fides. |
| 5 | Nam solitus rerum cursus facit esse probanda, |
| 6 | Quae semper simili sub ratione vides. |
| 7 | Haec tamen interdum quoniam secus accidit esse, |
| 8 | Non sunt certa satis, nec tamen absque fide. |
| 9 | Ergo quod affirmat verum, putat esse necesse, |
| 10 | In reliquis dicit: Credo vel esse puto. |
| 11 | Mensque modesta solet sic castigare loquelam, |
| 12 | Ut falsi nullus arguat esse ream. |
| 13 | Sic adiectivis sermonem temperat omnem, |
| 14 | Debeat ut merito semper habere fidem. |