Ioannes Saresberiensis, Entheticus, CXI Quod globus terrae planetarum circulis excentricus
| 1 | est et faex elementorum. |
| 2 | Septem terra vagis excentrica subiacet astris, |
| 3 | Quam tamen ut centrum maximus orbis habet. |
| 4 | Inferior paret semper globus exteriori, |
| 5 | Terra subest cunctis orbibus apta pati. |
| 6 | Haec immota manet, sed in orbem caetera currunt, |
| 7 | In medium recidunt pondera cuncta locum. |
| 8 | Faex etenim semper in fundo tarda quiescit, |
| 9 | Attactuque suo sordida quaeque facit |
| 10 | Omnia sordescunt, quae turpi faece replentur, |
| 11 | Quae, nisi purgentur, vasa perire facit. |
| 12 | Sic infecta diu devictaque faecis acore |
| 13 | Vix caput attollit mens onerata luto. |
| 14 | Nam prope tellurem sunt fumi, flamina, nubes, |
| 15 | Quae turbant oculos et rationis opus. |
| 16 | Contra naturam facies humana reflectit |
| 17 | Ad terram vultus, nata videre Deum. |
| 18 | Sed tamen interdum terrena videntur ad usum, |
| 19 | Nec peccat, si sit tetra libido procul. |
| 20 | Principis haec tradit sapientum dogma Platonis |
| 21 | A quo posteritas dogmata vera capit. |
| 22 | Sicigitur docuit, quid cui sit scibile, quid non, |
| 23 | Ut teneant proprium cuncta creata modum. |