Ioannes Saresberiensis, Entheticus, XLV De errore Epicureorum.
| 1 | Sobrius exaudit leges Epicurus, et idem |
| 2 | Ebrius est Veneri subditus atque gulae. |
| 3 | Hic faber incudem, quam circumvallat inani, |
| 4 | Figit in incerto, caetera casus agit. |
| 5 | Conflat in immensum corpuscula casus acervum, |
| 6 | Ut fiat mundi maximus iste globus. |
| 7 | Fixaque sint elementa locis sub lege perenn., |
| 8 | Utque vices peragant tempora certa suas. |
| 9 | Haec quoque secta docet, animam cum carne perire |
| 10 | Et frustra leges iustitiamque coli. |
| 11 | Flatibus assimulat subtilia corpora mentes, |
| 12 | Mentiturque piis praemia nulla dari. |
| 13 | Qui deceat, nescit; Venus, alea, somnus, odores, |
| 14 | Crassa culina, iocus, otia, vina iuvant. |
| 15 | Istis addantur plausus, fallacia, nugae |
| 16 | Et quidquid mimus, histrio, scurra probant. |