Ioannes Saresberiensis, Entheticus, XXXIII De timore moderando et desperatione vitanda.
| 1 | Lex iubet, ut timeas, sed desperare timentem |
| 2 | Non sinit; hoc omni crimine maius habet. |
| 3 | Omnem cum solvat confessio pura reatum |
| 4 | Et lavet internus crimina cuncta dolor, |
| 5 | Hoc scelus excludit veniam, poenamque meretur, |
| 6 | Quam prece vel pretio flectere nemo potest. |
| 7 | Crimina criminibus cumulat, male gesta fateri |
| 8 | Negligit, absorbet vota precesque timor, |
| 9 | Clementem negat esse Deum, nec parcere pronum |
| 10 | Culpis, sed cupidum sanguinis esse putat. |
| 11 | Principis offensi nullus sic mitigat iram, |
| 12 | Sanguinis, ut dicat, semper habere sitim. |
| 13 | Desipit orator, animos quicunque feroces |
| 14 | Iudicis allegat, ut cadat ira gravis. |
| 15 | Numinis est proprium misereri semper ab ipso, |
| 16 | Hoc quisquis removet, denegat esse Deum. |