Hrabanus Maurus, Opuscula, I Responsa canonica super quibusdam..., III.
| 1 | De eo vero qui viduam proximi sui in coniugium duxit, illud considerandum est, quota generatione ipsa connubia inter propinquos fieri possunt, et sic de utroque sexu iudicium aequum agendum: quia alii tertia vel quarta generatione hoc fieri posse iudicabant: alii quinta, alii sexta. |
| 2 | Sed illud ibi praecipue considerandum est, quod lex divina inde praecipiat, super quo capitulo Humberto episcopo sciscitanti iam respondimus. |
| 3 | Cuius responsionis formulam etiam nunc tibi direximus. |
| 4 | Manifestum est enim quod sacri canones ei anathema dicunt, qui de propria cognatione, vel quam cognatus habuit, duxerit uxorem. |
| 5 | Et ideo ibi summa est cautela habenda: ne forte pro incesti noxa aeterna damnatio sequatur. |