Hrabanus Maurus, Homiliae, II. HOMILIAE IN EVANGELIA ET..., HOMILIA CXLIX. IN ASSUMPTIONE SANCTAE MARIAE. Lectio libri Ecclesiastici.
| 1 | In omnibus his requiem quaesivi, et in haereditate Domini morabor. |
| 2 | Tunc praecepit et dixit mihi creator omnium: et qui creavit me, requievit in tabernaculo meo, etc. Dei filius verbum et sapientia Dei patris locutus per Salomonem in persona sapientiae quod est ipse, annuntians humano generi quod in eis requiescere et in illis manere desideraret, quia homo ad imaginem Dei factus, si in Deo manere voluerit, mundo corde et sincera voluntate Deus in eo manet, et ipse in Deo. |
| 3 | Unde in praesenti lectione, quam audistis loquitur sapientia Dei ad homines filius Dei: In omnibus his requiem quaesivi, ut est illud quod Apostolus ait: Deus enim vult omnem hominem salvum fieri et in agnitionem veritatis venire, ut relicto errore terrenae concupiscentiae et desideriis expugnatis carnalibus mundo corde et casto corpore dignum sapientiae Dei habitaculum in se praeparet unusquisque. |
| 4 | Nam subditur: Et in haereditate eius morabor. |
| 5 | Haereditas Dei sunt omnes diligentes Deum, et eius voluntatis fideles cooperatores in suam ipsorum salutem. |
| 6 | Tunc praecepit et dixit mihi creator omnium, et qui creavit me, requievit in tabernaculo meo. |
| 7 | Dei sapientia, id est, Dei filius manens in aeternitate cum Patre aequali per omnia Patri in maiestate, hominem quem ad suam imaginem fecit aeternae immortalitatis possessorem esse constituit; sed seducto a diabolo, et per peccatum mortali facto, sua misericordia proposuit humana se indui mortalitate, ut humanitatem iterum ad aeternam reduceret immortalitatem. |
| 8 | Et dixit mihi. |
| 9 | Multis modis antea per patriarchas et prophetas suum huic mundo nuntiavit adventum. |
| 10 | In Iacob inhabita. |
| 11 | In eis enim se habitare promisit, qui vitia et peccata supplantant, et conculcant ea bonae operationis studio divina gratia largiente: sequitur. |
| 12 | Et in Israel haereditare. |
| 13 | Id est, in his qui in castitate et bonorum operum sanctitate Dei visione dignos se exhibent, ut est illud: Beati mundi corde, quoniam ipsi Deum videbunt. |
| 14 | Et in electis meis mitte radices. |
| 15 | Hi sunt enim electi Dei, qui omnia oblectamenta huius mundi tota deserunt voluntate, qui huic mundo inhaerent sola tantum necessitate, de quibus dicit Apostolus: Qui utuntur hoc mundo, tanquam non utantur, id est, necessitate tantum, et non delectationis consensu. |
| 16 | Et sic in Sion firmata sum, et in civitate sanctificata similiter requievi, et in Hierusalem potestas mea. |
| 17 | In talibus enim Dei sapientia filius Dei manere dignatur, qui bonorum operum exemplis speculum vitae aliis praebent in semetipsis, et in sancta Ecclesia sanctis moribus sibimetipsis et aliis operantur salutem, et ad aeternae pacis visionem festinant. |
| 18 | Radicavi in populo honorificato, et in partes Dei mei haereditas illius. |
| 19 | Elegit enim Deus prae omnibus gentibus Israeliticum populum peculiarem, quia Israel vir videns Deum dicitur, eos vult spiritualiter intelligi, qui castitate vitae in sancta conversatione ad aeterna semper gaudia contemplanda festinant. |
| 20 | Quod eorum tantum donum est, qui divina gratia largiente pro solo appetitu aeternae gloriae continentiae vel etiam virginitatis propositum servant. |
| 21 | Quasi cedrus exaltata sum in Libano, et quasi cypressus in monte Sion. |
| 22 | Cedrus atque cypressus qui summi odoris sunt arbores, et altiores caeteris in Libano arboribus, qui ecclesiam significant excelsioris in ecclesia virtutis viros possumus intelligere, id est, virgines qui centesimum merentur metere fructum. |
| 23 | Quod manifeste signatum est in beatissima Dei genitrice Maria, cuius hodie annuum diem beatissimae assumptionis celebramus in coelum, quia quod Deus Dei filius se in hunc mundum ad redemptionem humani generis venisse promisit, non per nuptam quamvis sanctam, ut legimus multis in scripturis, non per viduam castam, sed per solum hoc virgineum corpus implevit. |
| 24 | Quia quasi sol oriens nitidus ab omni pollutionis sorde processit ex utero virginis matris felix certe et omni laude dignissima, quae de coelo suscepit prolem et mundo genuit salvatorem: cum igitur tanta sint merita virginitatis, non tamen repudiandus est thorus castitatis: quia bonum virginitatis non nisi a coniugali thoro procedit, castitas igitur in virgine alta est et summa si in corde simul persistit et corpore, sed castitas coniugalis sanctior est quae in corde simul persistit et corpore constat, quam illa quae in corde tantum est casta et corde diversis est modis adulterata, sive in iactantia aut in superbia aut etiam in appetitu libidinis. |
| 25 | Unde, dilectissimi, nobis omni studio servemus, non solum corpus, sed etiam cor nostrum ab omni quod odit Dominus, et in omni quod ei placet confirmare cor nostrum eius misericordiam postulemus; et inter haec omnia toto cordis affectu nos auxilium beatae Virginis imploremus, quia dum nos eam supplici obsequio frequentamus in terris, ipsa nos sedula prece Christo Domino nostro commendare dignatur in coelis; quod ipse praestare dignetur qui in trinitate perfecta regnat et dominatur per omnia saecula saeculorum. |
| 26 | Amen. |