Hrabanus Maurus, Homiliae, II. HOMILIAE IN EVANGELIA ET..., HOMILIA CXL. HEBDOMADA XII POST PENTECOSTEN. Lectio Epistolae B. Pauli ad Corinthios.
| 1 | Fratres, notum vobis facio Evangelium, etc. Hic praetermisso ordine praedicandi, ad doctrinam se contulit resurrectionis, eo quod nonnulli Corinthiorum de resurrectione dubitabant. |
| 2 | Quod et accepistis. |
| 3 | Id est, quod acceptum habuistis. |
| 4 | Et haec dicit, ne illi hoc non credidisse viderentur. |
| 5 | In quo et statis. |
| 6 | Id est, in bonis operibus perseverantes, in cuius doctrina ad coelestia estis erecti. |
| 7 | Per quod et salvamini. |
| 8 | Id est, per cuius doctrinam salutem speratis, et animarum et a diversis infirmitatibus corporum, quia sine fide resurrectionis perit omnimodo spes salutis. |
| 9 | Qua ratione praedicaverim vobis. |
| 10 | Ac si diceret, Tota ratio praedicationis nostrae haec est, ut resurrectionem credatis. |
| 11 | Hoc est enim praemium omnium qui Christum crediderunt, alioquin superfluus est omnis labor ieiuniorum, et omnium tribulationum, quas in hac vita pro Christo patimini. |
| 12 | Si retinetis, nisi frustra credidistis. |
| 13 | Id est nisi obliti estis, vel certe, si fidei vestrae vel laboris praemium resurgendo non speratis, vane creditis. |
| 14 | Tradidi enim vobis inprimis, Id est, ex quo vobis in primordio praedicavi tradidi mysterium resurrectionis, quod vel nostrae constat, vel primum . . . . Quod et accepi. |
| 15 | Accipere se dixit sive a lege, sive a senioribus, sive ab ipso Domino per revelationem. |
| 16 | Quoniam Christus mortuus est pro peccatis nostris secundum Scripturas. |
| 17 | Ut maiore posset beatus Apostolus auctoritate firmare quod praedicabat, hunc esse Christum salvatorem mundi dicit, quem Moyses et Prophetae annuntiaverunt, ideo et secundum Scripturas praedictum esse commemorat, ut illud, Sicut ovis ad occisionem ducetur, et quasi agnus coram tondente se obmutescet; et illud, Traditus est propter iniquitates nostras, et livore eius sanati sumus, et multa alia in divinis de passione eius invenies Scripturis. |
| 18 | Et quia sepultus est. |
| 19 | Ut illud Isaiae, et dabit impios pro sepultura eius, et divites pro morte sua. |
| 20 | Item ipse, Sepultura eius sublata est de medio. |
| 21 | Et quia surrexit tertia die secundum Scripturas. |
| 22 | Habes in Osee, vivificabit nos post duos dies, in die tertia suscitabit nos, et vivemus in conspectu eius. |
| 23 | Et quia visus est Cephae, id est, Petro. |
| 24 | Cephas enim Syrum nomen est. |
| 25 | Apparuit Petro sicut in Evangelio scriptum est, quia apparuit Simoni. |
| 26 | Et post hoc undecim. |
| 27 | Quando ad eos ianuis clausis intravit. |
| 28 | Hoc intelligendum, quia in Evangelio non omnes scriptae sunt visiones, sed tantum quae ad audientium sufficerent fidem. |
| 29 | Deinde visus est plus quam quingentis fratribus simul; ex quibus multi manent usque adhuc, quidam autem dormierunt. |
| 30 | Ut enim maior fides haberetur, multitudinem testium interposuit. |
| 31 | Ex quibus multi vivere dicuntur, qui possint interrogati dicere quae viderunt. |
| 32 | Multi vero iam dormire dicuntur in morte. |
| 33 | Deinde visus est Iacobo. |
| 34 | Iacobo Alphaei seorsum apparuit, ferunt enim quod ipse Iacobus Alphaei testatus sit, in coena Domini dicens, non se comesturum panem usquedum videret Christum a mortuis resurgentem. |
| 35 | Deinde Apostolis omnibus. |
| 36 | Multi hic Apostolos, illos omnes septuaginta quos Dominus misit ad praedicandum intelligi volunt. |
| 37 | Novissime autem omnium tanquam abortivo visus est et mihi. |
| 38 | Visus est illi in via quando lux circumfulsit eum sive in templo. |
| 39 | Haec ideo dicit, ne putarent eum audita potius quam visa narrare. |
| 40 | Tanquam abortivo dicit, quia est synagogae mortuus, et natus ecclesiae, tanquam abortivo, de cuius vita fuerat desperatum nisi per gratiam Domini violenter fuisset attractus. |
| 41 | Attractus autem praedicationibus non catenis et prae stupore novitatis invitus, qui erat in legis eruditione perfectus, sive ideo abortivus, quia merito synagoga eum male conceptum imperfectumque peperit. |
| 42 | Ego enim sum minimus apostolorum. |
| 43 | Haec de se propter humilitatem dicit; caeterum erat minimus tempore non labore: nam alibi ait, plus omnibus laboravi. |
| 44 | Qui non sum dignus vocari apostolus, quoniam persecutus sum Ecclesiam Dei. |
| 45 | Quare non sit dignus ipse exponens ait, Quoniam persecutus sum Ecclesiam Dei. |
| 46 | Docet nos exemplo suo etiam si ad praesens proficiamus, deflere praeterita, melius est enim dimissa recordari peccata, quam oblivisci commissa. |
| 47 | Scriptum est enim, Fili, peccasti, ne adiicias iterum, sed et de praeteritis deprecare. |
| 48 | Gratia autem Dei sum id quod sum, et gratia eius in me vacua non fuit. |
| 49 | Quia gratia qua redempti sumus laborem conatuum non meritum quaesivit. |
| 50 | Quotidiana autem gratia post baptismum quotidianum servitium laboris exspectat, in quo quisque bene operans usque in finem perseveraverit in perpetuum salvus erit. |