Hrabanus Maurus, Homiliae, II. HOMILIAE IN EVANGELIA ET..., HOMILIA LXXXVIII. SABBATO IN DUODECIM LECTIONIBUS. Lectio Ioelis prophetae.
| 1 | Haec dicit Dominus Deus: Effundam spiritum meum super omnem carnem: et prophetabunt filii vestri et filiae vestrae; senes vestri somnia somniabunt, et iuvenes vestri visiones videbunt. |
| 2 | Sed et super servos meos et ancillas meas effundam spiritum meum. |
| 3 | Et dabo prodigia in coelo et in terra, sanguinem et ignem et vaporem fumi. |
| 4 | Sol convertetur in tenebras, et luna in sanguinem: antequam veniat dies Domini magnus et horribilis. |
| 5 | Et erit: omnis quicunque invocaverit nomen Domini, salvus erit, etc. Hunc locum beatus apostolus Petrus impletum tempore Dominicae passionis exposuit, quando descendens die Pentecostes Spiritus sanctus datus est Apostolis, ita ut mirarentur qui aderant et dicerent: Nonne omnes isti qui loquuntur Galilaei sunt, et quomodo nos audivimus unusquisque linguam nostram in qua nati sumus: Parthi, et Medi, et Elamitae? etc. Neque vero omnis qui acceperit Spiritum sanctum statim habebit et gratiam spiritalem, sed per effusionem Spiritus sancti diversas gratias consequentur, alii prophetiam ut filii et filiae qui maioris sunt meriti, alii somnia ut senes iam provectioris aetatis, alii visitationes ut iuvenes qui vicerunt malignum; servi vero et ancillae qui adhuc Spiritum timoris habent et non dilectionis, quia perfectio foras mittit timorem, non habebunt prophetiam, non somnia, non visiones, sed Spiritus sancti effusione contenti, fidei tantum et salutis gratiam possidebunt. |
| 6 | Tunc dabit prodigia Dominus in coelo et in terra: in coelo, quia sol est versus in tenebras, et luna in sanguinem; in terra, quia tam vehementi et insolito motu terra contremuit ut monumenta aperta et saxa disrupta sint, quod autem dicit sanguinem et ignem et vaporem sive pavorem fumi, sanguis ille est, de quo et in Psalmista legimus: Ut intingatur pes tuus in sanguine, et in Isaia: Quam rubicunda sunt vestimenta tua, et quem percusso latere Salvatoris mistis aquis Romanus miles effudit, et ignis Spiritus sancti qui descendit de coelo, et in Actibus apostolorum legimus: Apparuerunt illis dispartitae linguae, tanquam ignis seditque supra singulos eorum: et repleti sunt omnes Spiritu sancto et coeperunt loqui aliis linguis prout Spiritus sanctus dabat eloqui illis. |
| 7 | Hic est ignis quem venit Dominus mittere super terram, et antequam pateretur in discipulis optabat ardere. |
| 8 | Sol quoque est versus in tenebras, quando pendentem Dominum suum videre non ausus est. |
| 9 | Et luna in sanguinem: quod iuxta historiam factum esse credamus et ab evangelistis silentio praetermissum. |
| 10 | Neque enim omnia quae fecit Iesus scripta referuntur: Quae si scribantur per singula, ne ipsum quidem arbitror mundum capere eos qui scribendi sunt libros. |
| 11 | Haec omnia priusquam dies Domini veniat magnus et horribilis futura describit, dies autem Domini magnus et horribilis, aut resurrectionis esse credendus est, aut certe multa post tempora dies iudicii qui vere magnus est et horribilis. |
| 12 | Sed quod sequitur, et erit omnis qui invocaverit nomen Domini salvus erit, et hoc apostolus Paulus refert ad tempus Dominicae passionis, magis de resurrectionis die intelligendum est. |