Hrabanus Maurus, Homiliae, II. HOMILIAE IN EVANGELIA ET..., HOMILIA LIX. FERIA II POST PENTECOSTEN Lectio Actuum apostolorum.
| 1 | In diebus illis aperiens Petrus os suum dixit: Viri fratres et patres, nobis praecepit Dominus praedicare populo, et testificari quia ipse est qui constitutus est a Deo iudex vivorum et mortuorum, etc. Sanctus Petrus apostolus volens ostendere Dominum nostrum Iesum Christum verum iudicem esse vivorum et mortuorum, sibi hoc et caeteris apostolis commendatum esse dicit ab ipso Domino ut praedicarent populis verbo et testificarentur dictis, atque exemplis sanctorum prophetarum, hoc dudum pronuntiatum esse. |
| 2 | Remissionem videlicet peccatorum accipere per nomen eius, omnes qui credunt in eum: quia non est in alio aliquo salus, nisi in eo quem Deus Pater omnipotens misit in mundum ut salvaretur per ipsum omnis qui crederet in eum, accepta remissione peccatorum per nomen eius intinctione sacri baptismatis et sancti Spiritus confirmatione, et probatione bonorum operum quae in fide recta ostendi debent. |
| 3 | Unde consequenter legitur, quod cum Petrus gentibus praedicasset verbum Dei, continuo cecidisset Spiritus sanctus super omnes qui audiebant verbum. |
| 4 | Et obstupuerunt ex circumcisione fideles qui venerant cum Petro, quia et in nationes Spiritus sancti gratia effusa est. |
| 5 | Audiebant enim illos loquentes linguis et magnificantes Deum. |
| 6 | Ne baptisma gentibus tradere dubitet, Spiritus sancti testimonio confirmatur, ipsas lavacri aquas quas sanctificare solet, novo ordine praecurrentis; quod semel in testimonium fidei gentium, nunquam vero in Iudaeis evenisse reperitur. |
| 7 | Et iussit eos in nomine Iesu Christi baptizari. |
| 8 | Cum Ecclesiae regula sit fideles in nomine sanctae Trinitatis baptizari, quaeritur quomodo Lucas per totum huius libelli textum non aliter quam in no mine Iesu Christi baptismum dari testetur. |
| 9 | Quod ita beatus Ambrosius solvit: quia per unitatem nominis impletum mysterium sit; quia sive Christum dicas, et Deum Patrem, a quo unctus est Filius, et ipsum qui unctus est Filium, et Spiritum sanctum quo unctus est designasti. |
| 10 | Scriptum est enim Iesum a Nazareth, quomodo unxit eum Deus Spiritu sancto: sive Patrem dicas: et Filium eius et Spiritum oris pariter indicasti. |
| 11 | Si tamen id etiam corde comprehendas. |
| 12 | Sive Spiritum dicas et Deum Patrem a quo procedit Spiritus, et Filium quia Filii quoque est Spiritus nuncupasti. |
| 13 | Unde et rationi copuletur auctoritas: in Spiritu quoque recte baptizari posse Scriptura indicat dicente Domino, Vos autem baptizabimini in Spiritu sancto, et Apostolus ait: Omnes enim in ipso corpore in unum Spiritum baptizati sumus. |
| 14 | Aliter praecipue congruit nos in nomine Domini nostri Iesu Christi baptizari, quia sicut Apostolus ait: Quicunque baptizati sumus in Christo Iesu, in morte ipsius baptizati sumus, consepulti enim sumus cum illo per baptismum in morte: ut quomodo resurrexit Christus a mortuis ver gloriam Patris, ita et nos in novitate vitae ambulemus. |
| 15 | Si enim complantati facti sumus similitudini mortis eius, simul et resurrectionis erimus, praestante ipso Redemptore nostro Iesu Christo, qui cum Patre et Spiritu sancto vivit et regnat Deus, per omnia saecula saeculorum. |
| 16 | Amen. |