Hrabanus Maurus, Homiliae, II. HOMILIAE IN EVANGELIA ET..., HOMILIA XL. DOMINICA IV POST OCTAVAM PASCHAE. Lectio Epistolae beati Iacobi apostoli.
| 1 | Charissimi, estote factores verbi, et non auditores tantum, etc. Sic et Paulus de legis cultoribus ait: Non auditores tantum legis iustificabuntur apud Deum, sed factores legis iusti sunt. |
| 2 | Et in Apocalypsi Ioannis, cum dixisset: Beatus qui legit et qui audit verba prophetiae libri huius, protinus adiunxit: Et servat ea quae in illo scripta sunt. |
| 3 | Quia si quis auditor est verbi et non factor, hic comparabitur viro consideranti vultum nativitatis suae in speculo; consideravit enim se et abiit, et statim oblitus est qualis fuerit. |
| 4 | Vultum nativitatis dicit vultum infantiae, quae nondum ad perfectum pervenit virum. |
| 5 | Mos mulierum est aspicere se in speculis, ut quidquid in se sordidum perspexerint, aut non bene compositum, in melius emendato, suis satagant placere maritis. |
| 6 | Quod facere moraliter animabus convenit nostris. |
| 7 | Debemus etenim nos in Evangelii, seu omnium divinarum Scripturarum conspicere speculo, et depositis sordibus, ornatisque moribus animarum nostrarum, Christo vero placere merito [Forte leg. marito]. |
| 8 | Qui autem perspexerit in lege perfecta libertatis, et permanserit in ea. |
| 9 | Legem perfectam libertatis gratiam Evangelii dicit; nihil enim ad perfectum lex adduxit. |
| 10 | Et alibi: Non enim accepistis spiritum servitutis iterum in timore, sed accepistis spiritum adoptionis filiorum. |
| 11 | Et iterum: Ubi enim spiritus Domini, ibi libertas. |
| 12 | Et ipse Dominus: Si vos, inquit, Filius liberaverit, vere liberi eritis. |
| 13 | Non auditor obliviosus factus, sed factor operis: hic beatus in facto suo erit. |
| 14 | Non auditu verbi supervacuo, sed operis exsecutione beatitudo praeparatur, sicut et Dominus loquens ad discipulos: Si autem scitis, beati eritis, inquit, si feceritis ea. |
| 15 | Si quis autem putat se religiosum esse, non refrenans linguam suam, sed seducens cor suum, huius vana est religio. |
| 16 | Monuerat supra verbum Dei non solum audire, sed et facere, nunc addit, quia et si mandata quis Domini quae didicit factis exercere videtur, si non etiam linguam a detractionibus, mendaciis, blasphemiis, stultiloquiis, ab ipso etiam multiloquio, caeterisque quibus peccare solet refrenaverit, frustra se de operum iustitia iactat, sicut et Paulus gentilis poetae sententiam approbans ait: Corrumpunt bonos mores colloquia mala. |
| 17 | Religio munda et immaculata apud Deum et Patrem, haec est. |
| 18 | Pulchre addidit, apud Deum et Patrem, quia sunt qui hominibus religiosi videntur, cum coram Deo habeantur profani. |
| 19 | Unde et Salomon ait: Est via quae videtur homini iusta; novissima autem eius deducunt ad mortem. |
| 20 | Visitare pupillos et viduas in tribulatione eorum, et immaculatum se custodire ab hoc saeculo. |
| 21 | Quia dixerat factorem operis beatum in facto suo futurum, nunc quae facta Deo maxime placeant dicit, misericordia scilicet et innocentia. |
| 22 | Namque in eo quod pupillos et viduas in tribulatione eorum visitare iussit, cuncta quae erga proximum misericorditer agere debemus insinuat. |
| 23 | Quod quantum valeat, ipso iudicii tempore pandetur, ubi dicturus est iudex: Quandiu fecistis uni de fratribus meis minimis, mihi fecistis. |
| 24 | Porro in eo quod immaculatos nos ab hoc saeculo custodiri praecepit universa in quibus nos ipsos castos servare decet ostendit; in quibus sunt ea quae supra observare monuerat, ut tardi simus ad loquendum, et tardi ad iram; et in patientia et in tribulatione praesentis vitae fortes simus ad sustinendum cuncta adversa, sicque recta fide ac bonis operibus studeamus ad aeternam vitam pervenire, praestante Domino nostro Iesu Christo, qui cum Patre et Spiritu sancto vivit et regnat Deus, per omnia saecula saeculorum. |
| 25 | Amen |