Hrabanus Maurus, De clericorum institutione, LIBER SECUNDUS., CAPUT XLVII. De cantico.
| 1 | Canticum enim primus omnium Moyses legitur instituisse, quando percussa Aegypto decem plagis, et Pharaone submerso, cum populo per insueta maris itinera, ad desertum gratulabundus egressus est, dicens: Cantemus Domino, gloriose enim honorificatus est (Exod. XV). |
| 2 | Item, idem auctor in Deuteronomio canticum praesagium futurorum conscripsit. |
| 3 | Deinde quoque Debbora non ignobilis femina, in libro Iudicum hoc mysterio functa reperitur; postea multos non solum viros, sed etiam feminas spiritu divino completas, Dei cecinisse mysteria. |
| 4 | Canticum autem vox humana est; psalmus autem, qui canitur ad psalterium. |