Hrabanus Maurus, De clericorum institutione, LIBER SECUNDUS., CAPUT XLVI. De festivitate veterum, et unde et festa vel feriae sint dictae.
| 1 | Festi autem dies in veteri lege isti fuerunt: dies Azymorum et Phase, quando, luna plenissima, abiecto fermento, agnus immolabatur. |
| 2 | Dies Pentecostes, qua in vertice montis, Sina lex data est Moysi, in quo de frugibus primi panes offerebantur propositionis. |
| 3 | Dies sabbatorum, in quo otia celebrabantur, et in quo manna in deserto non licebat colligere. |
| 4 | Dies Neomeniarum, celebratio novae lunae. |
| 5 | Semper autem Iudaei in mensium principio, hoc est prima luna, diem festum agebant. |
| 6 | Sed idcirco in principio mensis hoc faciebant, quia deficiente luna, tempus finitur, et iterum nascente, incipitur. |
| 7 | Dies autem tubarum septimi mensis principium est, quando Iudaei solemnitatem agentes amplius tuba canebant, et plura offerebant in eo sacrificia quam per singulos menses. |
| 8 | In hoc mense primo, decimo die mensis huius, dies propitiationum sive expiationum erat, quando pontifex semel in anno introibat in sancta sanctorum, et populo foris orante, ipse solus intus orabat, tam pro sua quam populi ignorantia offerens incensum Domino super altare thymiamatis. |
| 9 | In quo mense et dies erant celeberrimi Scenopegiae, id est, Tabernaculorum, quando a quindecimo die mensis huius, per septem dies in umbraculis habitabant, sumentes sibi spatulas palmarum, et ramos ligni densarum frondium, et salices de torrente, et laetabantur coram Domino Deo suo, in commemorationem exitus illorum de Aegypto, quod Dominus eos in tabernaculis habitare fecerit, cum eduxerit eos de terra Aegypti. |
| 10 | Dies ieiunii, primi, quarti, septimi et decimi mensis, ob eas causas celebres apud eos fuerunt ob quas supra commemoravimus, cum de ieiunio disputabamus. |
| 11 | Festi autem inde vocantur, quod ius in eis fatur, id est, dicitur, et nefasti, quibus non dicitur. |
| 12 | Similiter et feriae a fando dicuntur, ob quam causam Silvester papa primus apud Romanos constituit ut dierum nomina quae antea secundum nomina deorum suorum vocabant, id est, Solis, Lunae, Martis, Mercurii, Veneris, Saturni, feria deinceps vocarent, id est, prima feria, secunda feria, tertia feria, quarta feria, quinta feria, sexta feria, quia in principio Genesis scriptum est quod Deus per singulos dies dixerit: prima, Fiat lux; secunda, Fiat firmamentum; tertia, Producat terra herbam virentem, similiter, etc. Sabbatum autem antiquo legis vocabulo vocare praecepit, et primam feriam diem Dominicam, eo quod Dominus in illa resurrexit. |
| 13 | Statuit autem idem papa ut otium sabbati magis in diem Dominicam transferretur, ut ea die a terrenis operibus ad laudandum Deum vacaremus, iuxta illud quod scriptum est: Vacate et videte, quoniam ego sum Deus (Psal. XLV). |
| 14 | Secundum hunc autem morem in natalitiis sanctorum vacare, id est, ad laudes Dei celebrandas, sancta nos iubet Ecclesia. |
| 15 | Caeterum qui his diebus ad hoc vacare vult ab agri cultura, ut crapulae et ebrietati deserviat, vel iocis inanibus operam det, agnoscat se magis peccare per tale otium quam si alicui utili operi insisteret, Salomone teste, qui ait: Vae illis qui morantur in vino, et student calicibus epotandis (Prov. XXIII), et item: Acceptus, inquit, regi, minister est intelligens, iracundiam inutilis sustinebit (Prov. XIV). |
| 16 | Sed quia de festivitatibus celebrioribus, ad instructionem eorum qui in Ecclesia Deo serviunt, et populo praesunt, secundum sensum maiorum iam supra diximus, de origine quoque cantus, et lectionum, et auctoritate Symboli, adhuc in praesenti dicamus. |