| 1 | Stare hominis, in fide consistere significat, ut in Apostolo: State in fide [I Cor. XVI]. Ambulare, ad Deum tendere, ut in psalmo: Et ambulabam in latitudine [Psal. CXVIII]. Sedere, in Deo humiliter requiescere, ut in Evangelio: Vos autem sedete in civitate. Et in libro Regum de David dicitur: Seditque coram Domino [II Reg. VII]. Iacere, aut vitiis aut tentationibus succumbere. |
| 2 | Unde legitur in Evangelio: Et invenit eum iacentem in lecto [Marc. VII]. Currere, in operibus bonis prosperari. In Apostolo: Sic currite, ut comprehendatis [I Cor. IX], Et in malam partem: Pedes eorum ad malum currunt [Prov. I]. Ascensus, profectus in Domino. In psalmo: Ascensus in corde suo disposuit [Psal. LXXXIII]. Et in Exodo: Armati ascenderunt filii Israel de Aegypto [Exod. XIII]. Item in malam partem ascensus, superbiae praesumptio in Evangelio: Qui non intrat per ostium in ovile ovium, sed ascendit aliunde, ille fur est et latro [Ioan. X]. Descensus, defectus a Deo. In Evangelio: Homo quidam descendebat ab Hierusalem in Hiericho [Luc. X]. Et in Isaia: Vae, quia ascenditis equos, ut descendatis in Aegyptum [Isa. XXX]. |