Horatius, Epistulae, 1, Epistula XIV
| 1 | Vilice silvarum et mihi me reddentis agelli, |
| 2 | quem tu fastidis habitatum quinque focis et |
| 3 | quinque bonos solitum Variam dimittere patres, |
| 4 | certemus spinas animone ego fortius an tu |
| 5 | evellas agro, et melior sit Horatius an res. |
| 6 | Me quamvis Lamiae pietas et cura moratur, |
| 7 | fratrem maerentis, rapto de fratre dolentis |
| 8 | insolabiliter, tamen istuc mens animusque |
| 9 | fert et amat spatiis obstantia rumpere claustra. |
| 10 | Rure ego viventem, tu dicis in urbe beatum; |
| 11 | cui placet alterius, sua nimirum est odio sors, |
| 12 | stultus uterque locum inmeritum causatur inique; |
| 13 | in culpa est animus, qui se non effugit umquam. |
| 14 | Tu mediastinus tacita prece rura petebas, |
| 15 | nunc urbem et ludos et balnea vilicus optas; |
| 16 | me constare mihi scis et discedere tristem, |
| 17 | quandocumque trahunt invisa negotia Romam. |
| 18 | Non eadem miramur; eo disconvenit inter |
| 19 | meque et te; nam quae deserta et inhospita tesqua |
| 20 | credis, amoena vocat mecum qui sentit, et odit |
| 21 | quae te pulchra putas. Fornix tibi et uncta popina |
| 22 | incutiunt urbis desiderium, video, et quod |
| 23 | angulus iste feret piper et tus ocius uva, |
| 24 | nec vicina subest vinum praebere taberna |
| 25 | quae possit tibi, nec meretrix tibicina, cuius |
| 26 | ad strepitum salias terrae gravis; et tamen urges |
| 27 | iampridem non tacta ligonibus arva bovemque |
| 28 | disiunctum curas et strictis frondibus exples; |
| 29 | addit opus pigro rivus, si decidit imber, |
| 30 | multa mole docendus aprico parcere prato. |
| 31 | Nunc age, quid nostrum concentum dividat, audi. |
| 32 | Quem tenues decuere togae nitidique capilli, |
| 33 | quem scis immunem Cinarae placuisse rapaci, |
| 34 | quem bibulum liquidi media de luce Falerni, |
| 35 | cena brevis iuvat et prope rivum somnus in herba; |
| 36 | nec lusisse pudet, sed non incidere ludum. |
| 37 | Non istic obliquo oculo mea commoda quisquam |
| 38 | limat, non odio obscuro morsuque venenat; |
| 39 | rident vicini glaebas et saxa moventem. |
| 40 | Cum servis urbana diaria rodere mavis; |
| 41 | horum tu in numerum voto ruis, invidet usum |
| 42 | lignorum et pecoris tibi calo argutus et horti. |
| 43 | Optat ephippia bos piger, optat arare caballus; |
| 44 | quam scit uterque, libens, censebo, exerceat artem. |