Horatius, Epistulae, 1, Epistula XIII
| 1 | Ut proficiscentem docui te saepe diuque, |
| 2 | Augusto reddes signata volumina, Vinni, |
| 3 | si validus, si laetus erit, si denique poscet; |
| 4 | ne studio nostri pecces odiumque libellis |
| 5 | sedulus inportes opera vehemente minister. |
| 6 | Si te forte meae gravis uret sarcina chartae, |
| 7 | abicito potius quam quo perferre iuberis |
| 8 | clitellas ferus inpingas Asinaeque paternum |
| 9 | cognomen vertas in risum et fabula fias. |
| 10 | Viribus uteris per clivos, flumina, lamas. |
| 11 | Victor propositi simul ac perveneris illuc, |
| 12 | sic positum servabis onus, ne forte sub ala |
| 13 | fasciculum portes librorum, ut rusticus agnum, |
| 14 | ut vinosa glomus furtivae Pyrria lanae, |
| 15 | ut cum pilleolo soleas conviva tribulis. |
| 16 | Ne volgo narres te sudavisse ferendo |
| 17 | carmina quae possint oculos aurisque morari |
| 18 | Caesaris; oratus multa prece, nitere porro. |
| 19 | Vade, uale, cave ne titubes mandataque frangas. |