Horatius, Carmina, 3, XXVIII
| 1 | Festo quid potius die |
| 2 | Neptuni faciam? Prome reconditum, |
| 3 | Lyde, strenua Caecubum |
| 4 | munitaeque adhibe vim sapientiae. |
| 5 | Inclinare meridiem |
| 6 | sentis ac, veluti stet volucris dies, |
| 7 | parcis deripere horreo |
| 8 | cessantem Bibuli consulis amphoram? |
| 9 | Nos cantabimus invicem |
| 10 | Neptunum et viridis Nereidum comas, |
| 11 | tu curva recines lyra |
| 12 | Latonam et celeris spicula Cynthiae; |
| 13 | summo carmine, quae Cnidon |
| 14 | fulgentisque tenet Cycladas et Paphum |
| 15 | iunctis visit oloribus; |
| 16 | dicetur merita Nox quoque nenia. |