Horatius, Carmina, 3, XXV
| 1 | Quo me, Bacche, rapis tui |
| 2 | plenum? Quae nemora aut quos agor in specus |
| 3 | velox mente nova? Quibus |
| 4 | antrum egregii Caesaris audiar |
| 5 | aeternum meditans decus |
| 6 | stellis inserere et consilio Iovis? |
| 7 | Dicam insigne, recens, adhuc |
| 8 | indictum ore alio. Non secus in iugis |
| 9 | exsomnis stupet Euhias, |
| 10 | Hebrum prospiciens et nive candidam |
| 11 | Thracen ac pede barbaro |
| 12 | lustratam Rhodopen, ut mihi devio |
| 13 | ripas et vacuum nemus |
| 14 | mirari libet. O Naiadum potens |
| 15 | Baccharumque valentium |
| 16 | proceras manibus vertere fraxinos, |
| 17 | nil parvum aut humili modo, |
| 18 | nil mortale loquar. Dulce periculum est, |
| 19 | o Lenaee, sequi deum |
| 20 | cingentem viridi tempora pampino. |