Horatius, Carmina, 3, XVIII
| 1 | Faune, Nympharum fugientum amator, |
| 2 | per meos finis et aprica rura |
| 3 | lenis incedas abeasque parvis |
| 4 | aequus alumnis, |
| 5 | si tener pleno cadit haedus anno |
| 6 | larga nec desunt Veneris sodali |
| 7 | vina craterae, vetus ara multo |
| 8 | fumat odore. |
| 9 | Ludit herboso pecus omne campo, |
| 10 | cum tibi Nonae redeunt Decembres, |
| 11 | festus in pratis vacat otioso |
| 12 | cum bove pagus; |
| 13 | inter audacis lupus errat agnos, |
| 14 | spargit agrestis tibi silva frondes, |
| 15 | gaudet invisam pepulisse fossor |
| 16 | ter pede terram. |