Horatius, Carmina, 3, XVII
| 1 | Aeli vetusto nobilis ab Lamo -- |
| 2 | quando et priores hinc Lamias ferunt |
| 3 | denominatos et nepotum |
| 4 | per memores genus omne fastos, |
| 5 | auctore ab illo ducis originem, |
| 6 | qui Formiarum moenia dicitur |
| 7 | princeps et innantem Maricae |
| 8 | litoribus tenuisse Lirim, |
| 9 | late tyrannus, -- cras foliis nemus |
| 10 | multis et alga litus inutili |
| 11 | demissa tempestas ab Euro |
| 12 | sternet, aquae nisi fallit augur |
| 13 | annosa cornix. Dum potes, aridum |
| 14 | conpone lignum; cras Genium mero |
| 15 | curabis et porco bimenstri |
| 16 | cum famulis operum solutis. |