Horatius, Carmina, 3, XV
| 1 | Uxor pauperis Ibyci, |
| 2 | tandem nequitiae fige modum tuae |
| 3 | famosisque laboribus; |
| 4 | maturo propior desine funeri |
| 5 | inter ludere virgines |
| 6 | et stellis nebulam spargere candidis. |
| 7 | Non, si quid Pholoen satis, |
| 8 | et te, Chlori, decet. Filia rectius |
| 9 | expugnat iuvenum domos, |
| 10 | pulso Thyias uti concita tympano. |
| 11 | Illam cogit amor Nothi |
| 12 | lasciva similem ludere capreae: |
| 13 | te lanae prope nobilem |
| 14 | tonsae Luceriam, non citharae decent |
| 15 | nec flos purpureus rosae |
| 16 | nec poti vetulam faece tenus cadi. |