Horatius, Carmina, 3, XIII
| 1 | O fons Bandusiae splendidior vitro, |
| 2 | dulci digne mero non sine floribus, |
| 3 | cras donaberis haedo, |
| 4 | cui frons turgida cornibus |
| 5 | primis et venerem et proelia destinat. |
| 6 | Frustra: nam gelidos inficiet tibi |
| 7 | rubro sanguine rivos |
| 8 | lascivi suboles gregis. |
| 9 | Te flagrantis atrox hora Caniculae |
| 10 | nescit tangere, tu frigus amabile |
| 11 | fessis vomere tauris |
| 12 | praebes et pecori vago. |
| 13 | Fies nobilium tu quoque fontium |
| 14 | me dicente cavis impositam ilicem |
| 15 | saxis, unde loquaces |
| 16 | tymphae desiliunt tuae. |