Horatius, Carmina, 3, IV
| 1 | Descende caelo et dic age tibia |
| 2 | regina longum Calliope melos, |
| 3 | seu voce nunc mavis acuta |
| 4 | seu fidibus citharave Phoebi. |
| 5 | Auditis? An me ludit amabilis |
| 6 | insania? Audire et videor pios |
| 7 | errare per lucos, amoenae |
| 8 | quos et aquae subeunt et aurae. |
| 9 | Me fabulosae Volture in Apulo |
| 10 | nutricis extra limina Pulliae |
| 11 | ludo fatigatumque somno |
| 12 | fronde nova puerum palumbes |
| 13 | texere, mirum quod foret omnibus |
| 14 | quicumque celsae nidum Aceruntiae |
| 15 | saltusque Bantinos et arvum |
| 16 | pingue tenent humilis Forenti, |
| 17 | ut tuto ab atris corpore viperis |
| 18 | dormirem et ursis, ut premerer sacra |
| 19 | lauroque conlataque myrto, |
| 20 | non sine dis animosus infans. |
| 21 | Vester, Camenae, vester in arduos |
| 22 | tollor Sabinos, seu mihi frigidum |
| 23 | Praeneste seu Tibur supinum |
| 24 | seu liquidae placuere Baiae; |
| 25 | vestris amicum fontibus et choris |
| 26 | non me Philippis versa acies retro, |
| 27 | devota non extinxit arbor |
| 28 | nec Sicula Palinurus unda. |
| 29 | Utcumque mecum vos eritis, libens |
| 30 | insanientem navita Bosphorum |
| 31 | temptabo et urentis harenas |
| 32 | litoris Assyrii viator, |
| 33 | visam Britannos hospitibus feros |
| 34 | et laetum equino sanguine Concanum, |
| 35 | visam pharetratos Gelonos |
| 36 | et Scythicum inviolatus amnem. |
| 37 | Vos Caesarem altum, militia simul |
| 38 | fessas cohortes abdidit oppidis, |
| 39 | finire quaerentem labores |
| 40 | Pierio recreatis antro; |
| 41 | vos lene consilium et datis et dato |
| 42 | gaudetis, almae. Scimus ut impios |
| 43 | Titanas imnanemque turbam |
| 44 | fulmine sustulerit caduco, |
| 45 | qui terram inertem, qui mare temperat |
| 46 | ventosum et urbes regnaque tristia |
| 47 | divosque mortalisque turmas |
| 48 | imperio regit unus aequo. |
| 49 | Magnum illa terrorem intulerat Iovi |
| 50 | fidens iuventus horrida bracchiis |
| 51 | fratresque tendentes opaco |
| 52 | Pelion imposuisse Olympo. |
| 53 | Sed quid Typhoeus et validus Mimas |
| 54 | aut quid minaci Porphyrion statu, |
| 55 | quid Rhoetus evolsisque truncis |
| 56 | Enceladus iaculator audax |
| 57 | contra sonantem Palladis aegida |
| 58 | possent ruentes? Hinc avidus stetit |
| 59 | Volcanus, hinc matrona Iuno et |
| 60 | nunquam umeris positurus arcum, |
| 61 | qui rore puro Castaliae lavit |
| 62 | crinis solutos, qui Lyciae tenet |
| 63 | dumeta natalemque silvam, |
| 64 | Delius et Patareus Apollo. |
| 65 | Vis consili expers mole ruit sua; |
| 66 | vim temperatam di quoque provehunt |
| 67 | in maius; idem odere vires |
| 68 | omne nefas animo moventis. |
| 69 | Testis mearum centimanus gigas |
| 70 | sententiarum, notus et integrae |
| 71 | temptator Orion Dianae, |
| 72 | virginea domitus sagitta. |
| 73 | Iniecta monstris Terra dolet suis |
| 74 | maeretque partus fulmine luridum |
| 75 | missos ad Orcum; nec peredit |
| 76 | impositam celer ignis Aetnen, |
| 77 | incontinentis nec Tityi iecur |
| 78 | reliquit ales, nequitiae additus |
| 79 | custos; amatorem trecentae |
| 80 | Pirithoum cohibent catenae. |