Horatius, Carmina, 2, XI
| 1 | Quid bellicosus Cantaber et Scythes, |
| 2 | Hirpine Quincti, cogitet Hadria |
| 3 | divisus obiecto, remittas |
| 4 | quaerere nec trepides in usum |
| 5 | poscentis aevi pauca: fugit retro |
| 6 | levis iuventas et decor, arida |
| 7 | pellente lascivos amores |
| 8 | canitie facilemque somnum. |
| 9 | Non semper idem floribus est honor |
| 10 | vernis neque uno luna rubens nitet |
| 11 | voltu: quid aeternis minorem |
| 12 | consiliis animum fatigas? |
| 13 | Cur non sub alta vel platano vel hac |
| 14 | pinu iacentes sic temere et rosa |
| 15 | canos odorati capillos, |
| 16 | dum licet, Assyriaque nardo |
| 17 | potamus uncti? dissipat Euhius |
| 18 | curas edacis. Quis puer ocius |
| 19 | restinguet ardentis Falerni |
| 20 | pocula praetereunte lympha? |
| 21 | Quis devium scortum eliciet domo |
| 22 | Lyden? Eburna dic, age, cum lyra |
| 23 | maturet, in comptum Lacaenae |
| 24 | more comas religata nodum. |