| 1 | Rectius vives, Licini, neque altum |
| 2 | semper urgendo neque, dum procellas |
| 3 | cautus horrescis, nimium premendo |
| 4 | litus iniquom. |
| 5 | Auream quisquis mediocritatem |
| 6 | diligit, tutus caret obsoleti |
| 7 | sordibus tecti, caret invidenda |
| 8 | sobrius aula. |
| 9 | Saepius ventis agitatur ingens |
| 10 | pinus et celsae graviore casu |
| 11 | decidunt turres feriuntque summos |
| 12 | fulgura montis. |
| 13 | Sperat infestis, metuit secundis |
| 14 | alteram sortem bene praeparatum |
| 15 | pectus. Informis hiemes reducit |
| 16 | Iuppiter, idem |
| 17 | summovet. Non, si male nunc, et olim |
| 18 | sic erit: quondam cithara tacentem |
| 19 | suscitat Musam neque semper arcum |
| 20 | tendit Apollo. |
| 21 | Rebus angustis animosus atque |
| 22 | fortis appare; sapienter idem |
| 23 | contrahes vento nimium secundo |
| 24 | turgida vela. |