Horatius, Carmina, 2, IV
| 1 | Ne sit ancillae tibi amor pudori, |
| 2 | Xanthia Phoceu: prius insolentem |
| 3 | serva Briseis niveo colore |
| 4 | movit Anchillem; |
| 5 | movit Aiacem Telamone natum |
| 6 | forma captivae dominum Tecmessae; |
| 7 | arsit Atrides medio in triumpho |
| 8 | virgine rapta, |
| 9 | barbarae postquam cecidere turmae |
| 10 | Thessalo victore et ademptus Hector |
| 11 | tradidit fessis leviora tolli |
| 12 | Pergama Grais. |
| 13 | Nescias an te generum beati |
| 14 | Phyllidis flavae decorent parentes; |
| 15 | regium certe genus et penatis |
| 16 | maeret iniquos. |
| 17 | Crede non illam tibi de scelesta |
| 18 | plebe delectam, neque sic fidelem, |
| 19 | sic lucro aversam potuisse nasci |
| 20 | matre pudenda. |
| 21 | Bracchia et voltum teretisque suras |
| 22 | integer laudo: fuge suspicari |
| 23 | cuius octavum trepidavit aetas |
| 24 | claudere lustrum. |