| 1 | Tu ne quaesieris (scire nefas) quem mihi, quem tibi |
| 2 | finem di dederint, Leuconoe, nec Babylonios |
| 3 | temptaris numeros. Ut melius quicquid erit pati! |
| 4 | Seu pluris hiemes seu tribuit Iuppiter ultimam, |
| 5 | quae nunc oppositis debilitat pumicibus mare |
| 6 | Tyrrhenum, sapias, vina liques et spatio brevi |
| 7 | spem longam reseces. Dum loquimur, fugerit invida |
| 8 | aetas: carpe diem, quam minimum credula postero. |