Hildegardis Abbatissa, Physica, 3, 16

monumenta.ch > Hildegardis Abbatissa > 52 > 45 > 12 > 40 > 16
Hildegardis Abbatissa, Physica, 3, XV. DE LAURO . <<< >>> XVII. DE DATILBAUM .

Hildegardis Abbatissa, Physica, 3, Caput XVI. DE OLEYBAUM [Olea Europaea.] [III, 17].

Oleybaum plus calida quam frigida est, et misericordiam signat [Et---signat om. ed.]. Exteriorem autem corticem et folia arboris huius in aqua coque, et tunc cum aqua et veteri arvina unguentum fac, et si quis in corde, aut in dorso, aut in latere, aut in lenden de gicht dolet, ibi eum hoc unguento unge, et cutem eius ita pertransit velut smaltz novam ollam si in ea ad ignem ponitur, et melius habebit [Unguentum fac, et ubicunque de paralysi dolet, se inungat et melius habebit. ed.]. Et cui stomachus infrigidatus est, corticem et folia eiusdem arboris in aqua coquat, et aquam illam per pannum colat, et tunc minus de hartz et etiam de mirra minus quam de hartz, sic in patella ad ignem dissolvat, id est zulasze, et praedicto succo addat, et sic emplastrum faciat, et in illo pannum de canapo intinguat, et illum super stomachum suum ponat, et stomachus eius calefiet, et bonam digestionem ei parabit. Oleum autem de fructu arboris huius ad comedendum non valet multum, quia si comeditur, nauseam provocat et alios cibos comedendo molestos facit [Et alios---facit om. ed.]. Sed ad plurima medicamenta valet. Nam cum oleum eius primum paratur, ad ignem coquatur, et tunc rosae et violae ei imponantur, et sic contra diversas febres valet, et quia ad ignem coctum est, necesse non est ut amplius ad solem ponatur [Et quia---ponatur om. ed.---Huius capituli finem in ed. auctiorem hic sistimus: «Si aliquis in capite dolet, oleum olivae, et minus rosatae aquae in sartagine fervere faciat, et de fructu solatri minus quam olei sit, et de urente urtica plus quam de fructu solatri, terat, et per pannum colet, et succum istum in sartaginem ad oleum fundat, et denuo fervere faciat. Quod cum fecerit, iterum colet, et in novum fictile vas fundat. Deinde in vertice, in fronte et in temporibus suis, quando in capite dolet, cum unguento se ungat, et cerato panno circumliget. Si autem ulcus aliquod seu pustula hominem acerbe dolere facit, antequam rumpatur, oleo olivae deliniatur. Quod si quispiam a paralysi fatigatur, rosas oleo olivae imponat, et se ungat, et melius habebit. Quod si crampho alicubi hominem in corpore suo laedit, cum oleo olivae fortiter se perungat, et melius habebit.»]. Si quispiam a gicht fatigatur, rosas eidem oleo imponat, et ubi eum in corpore gicht movet, ibi se ungat et melius habebit.

Sed si quis in capite aut in lenden dolet, vel si alicui in corpore eius absque casu aut absque ictu tumor per se exsurgit, tunc violas praefato oleo imponat, et ubi dolet se ungat, et si tumor est, iuxta tumorem et non super tumorem ungat.