Hildegardis Abbatissa, Physica, 1, Caput CXIII. DE GARWA [II, 122].
| 1 | Garwa [Millefolium ed.] aliquantulum calida et sicca est, et discretas ac subtiles vires ad vulnera habet. Nam si homo in percussione vulneratur, postquam vulnus vino lavatur, et Garwa modice in aqua cocta, et modice aqua expressa, ita calida desuper pannum illum qui super vulnus iacet leviter ligetur, et sic vulneri putredinem et swern, id est ulcus, aufert, et vulnus sanat. |
| 2 | Et sic saepe fiat, quamdiu necesse fuerit; sed potquam vulnus aliquantum astringi et sanari coeperit, tunc panno abiecto, absque illo, Garwa vulneri superponatur, et tanto sanius et perfectius sanatur. Qui autem interius in corpore vulnus accepit, ita quod aut contis [casu ed.] fractus, aut constrictus interius fuerit, istam garwam pulverizet, et pulverem illum in calida aqua bibat. |
| 3 | Et postquam melius habuerit, tunc eumdem pulverem in calido vino accipiat, dum sanetur.--- [Et homo quem tertiana febris fatigat, millefolium et bis tantum polypodii in suavi et bono vino coquat, et per pannum colet, et in ipsa accessione febris vinum hoc bibat; herbas autem istas in vino per triduum bibat, et si necesse fuerit, iterum similibus novis herbis renovet, et febrem istam mitigat, et sanabitur. Add. ed.] |