| 1 | Et ab eadem medietate rubeus circulus in modum arcus se extendens, totam exteriorem partem occidentis, nec non et quasdam distinctiones quae extra rotunditatem illius sunt, comprehendit, quia a perfectione illa qua Deus ipsum colentes misericorditer fovet, ignis zeli sui per vindictam iustae extensionis eos qui extra ambitum bonorum operum incedunt, illosque qui extra integritatem verae fidei sunt iuste diiudicat, atque ad loca poenalia damnat, scilicet a termino praefatae australis alae circa occidentem usque ad terminum septentrionalis alae se retorquendo, cum a prosperitate praesentis vitae culpabilia facta proiiciens, ea in asperitatem flagellorum suorum mittit, quoniam veritatem iustitiae non tenuerint. |
| 2 | Quod autem ab ipsa rotunditate versus orientem inter praefatas alas quasi aedificium sursum usque ad supradictum globum ascendens apparet, hoc est quod a terrenis causis se avertens per ortum iustitiae inter protectionem Dei civitas vivis ex lapidibus constructa, ad iudicium Dei aspectum suum dirigit, ipsum glorificans, quia fideles animae Deum assidue laudant, quoniam omnia recte dispensat. |