Hildegardis Abbatissa, Divina Opera, 2, VII. De circulo fortis albi et lucidi aeris quanta utilitate quintum locum obtineat, et quantae densitatis sit, et quid et ipse significet, vel quare superiori, ut velut unus sint, copuletur.
| 1 | Sub eodem autem circulo, aquosi scilicet aeris, alius circulus fortis, et albi lucidique aeris huius similitudinis in rigore suo existens, ut nervus in corpore hominis est, ostenditur, qui periculis superiorum aquarum oppositus, fortitudine et tenacitate sua inundationes illarum retinet, ne repentina et incongrua effusione terram obruant, significans etiam, quod discretio sancta opera in huiusmodi temperamento confirmat, ut homo corpus suum ita constringat, ne iniuste constrictum in ruinam vadat. |
| 2 | Qui ubique in circuitu suo eiusdem densitatis, cuius densitas circuli praefati nigri ignis apparet, quoniam iste ad utilitatem hominum aequali modo, sicut et ille ad vindictam peccatorum eorum positus est. |
| 3 | Sed quoties inferiores aquae ad vindictam malorum iusto Dei iudicio in nimietate sursum per nubes trahuntur, quidam humor de aquoso aere per istum fortem et album lucidumque aerem, velut potus hominis in vesicam ipsa integra permanente transsudat, qui easdem aquas periculosa inundatione descendere facit. |
| 4 | Unde et discretio opera hominum ad salutem eorum ubique iusta moderatione discernit, cum iudicia Dei peccata illorum in vindicta non transcendunt, sed cum ea iuste diiudicant, quoniam protector et rector iusta aequitate se invicem continent. |
| 5 | Hi quoque duo circuli sibi invicem ita copulantur, ut velut unus circulus sint appareant, quia in humore madescunt, et aliis humorem infundunt, quemadmodum et discretio bona opera in moderatione sua continet, ne in ruinam vadant. |