Hieronymus, De situ et nominibus locorum Hebraicorum, LIBER., 78. DE GENESI.
| 1 | Sidon, urbs Phoenices insignis, olim terminus Chananaeorum ad Aquilonem respiciens, et postea regionis Iudaeae. |
| 2 | Cecidit autem in sortem tribus Aser, sed non eam possedit, quia hostes nequaquam valuit expellere. |
| 3 | Sennaar, campus Babylonis, in quo turris exstructa est. |
| 4 | Unde egressus Assur aedificavit Ninevem. |
| 5 | Meminit huius loci Iosephus in primo Antiquitatum libro, ita scribens: « De campo qui in Babylonia regione vocatur Sennaar, narrat Hestiaeus historicus, dicens: Quidam sacerdotum profugi de templo Enyalii Iovis sacra rapientes, in Sennaar campum Babyloniae pervenere. |
| 6 | Sichem et Salem, quae (Latine et Graece) Sicima vocata est, civitas Iacob, nunc deserta. |
| 7 | Ostenditur autem locus in suburbanis Neapoleos iuxta sepulcrum Ioseph; quam subvertit Abimelec, et seminavit in ea salem, sicut in libro Iudicum (Iud. IX, 45) scriptum est. |
| 8 | Postea vero instaurata est a Ieroboam, ut Regnorum narrat historia , et sita est in finibus tribus Ephraim. |
| 9 | Sed et filius Emmor appellabatur Sichem, a quo et locus nomen acceperat. |
| 10 | Fuit autem et altera Sichem in monte Ephraim, civitas fugitivorum. |
| 11 | Sennaar, unde fuit Amarfal, qui adversus reges Sodomorum bellum gessit. |
| 12 | Sodoma, civitas impiorum divino igne consumpta, iuxta mare Mortuum. |
| 13 | 267 Seboim, et haec civitas impiorum in aeternos cineres dissoluta, iuxta urbem quondam Sodomam. |
| 14 | Sophera, mons orientis in India, iuxta quem habitaverunt filii Iectan, filii Heber. |
| 15 | Quos Iosephus refert a Cophene flumine et Indiae regionibus usque ad id locorum pervenisse, ubi appellatur regio Hieria: sed et classis Salomonis per triennium hinc quaedam commercia deportabat. |
| 16 | Soora, urbs iuxta Sodomam, quae et Segor et Zoara (de qua et supra diximus). |
| 17 | Save, civitas antiqua in qua habitaverunt Amorrhaei, gens valida, super regionem Sodomae, quam excidit Chodologomor. |
| 18 | Seir, mons in terra Edom, in qua habitavit Esau in regione Gebalena: quae ex eo quod Esau pilosus esset et hispidus, Seir, id est, pilosi nomen accepit. |
| 19 | In quibus locis antea habitavit Chorraeus, quem interfecit Chodologomor. |
| 20 | Meminit montis Seir et Isaias in visione Idumaeae. |
| 21 | Salem, civitas Sicimorum, quae est Sichem; sed et alia villa ostenditur usque in praesentem diem (Iuxta Aeliam contra occidentalem plagam hoc nomine; in octavo quoque lapide a Scythopoli in campo vicus Salumias appellatur: Iosephus vero Salem esse affirmat , in qua regnavit Melchisedec, quae postea dicta est Solyma, et ad extremum, Ierosolymae nomen accepit). |
| 22 | Sur, ubi invenit Angelus ancillam Sarae Agar, inter Cades et Barad. |
| 23 | Extenditur autem desertum Sur usque ad mare Rubrum, quod ad Aegypti confinia pervenit. |
| 24 | Porro Cades, solitudo est super urbem Petram: sed et Scriptura desertum Cades contra faciem Aegypti extendi memorat, ad quod primum venere Hebraei, Rubro mari transvadato. |
| 25 | 270 Segor, quae et Bala et Zoara, una de quinque civitatibus Sodomorum ad preces Lot de incendio reservata, quae usque nunc ostenditur. |
| 26 | Meminit huius et Isaias in visione contra Moab, de qua et supra diximus. |
| 27 | Sene, id est, tabernacula, locus in quo habitavit Iacob regressus de Mesopotamia (qui lingua Hebraica appellatur Soccoth ). |