Hieronymus, De situ et nominibus locorum Hebraicorum, LIBER., 43. DE GENESI.
| 1 | Geon, fluvius, qui apud Aegyptios Nilus vocatur, in paradiso oriens, et universam Aethiopiam circumiens. |
| 2 | Gomorrha, una de quinque civitatibus Sodomorum, quae cum reliquis divina ultione subversa est. |
| 3 | Gerara, ex cuius nomine nunc Geraritica vocatur regio trans Daroma, procul ab Eleutheropoli millibus viginti quinque ad meridiem. |
| 4 | Erat autem olim terminus Chananaeorum ad australem plagam, et civitas metropolis Palaestinae. |
| 5 | Scriptura commemorat fuisse eam inter Cades et Sur, hoc est inter duas solitudines: quarum una Aegypto iungitur, ad quam populus trans fretum Rubri maris pervenit; altera vero Cades, usque ad Saracenorum eremum extenditur. |
| 6 | Galaad, mons ad quem septimo die profectionis e Charris Iacob profugus venit. |
| 7 | Est autem ad tergum Phoenices et Arabiae, collibus Libani copulatus: extenditurque per desertum usque ad eum locum, ubi trans Iordanem habitavit quondam Seon rex Amorrhaeorum. |
| 8 | Cecidit supradictus mons in sortem filiorum Ruben (et Gad, et dimidiae tribus Manasse; sed et Ieremias (XLII. 6) loquitur, Galaad tu mihi initium Libani ), a quo monte et civitas in eo condita, sortita vocabulum est: quam cepit de Amorrhaeorum manu Galaad filius Machis, filii Manasse. |
| 9 | Gader, turris, ubi habitante Iacob, Ruben patris violavit torum (quae absque G littera, in Hebraeo ader ( ) scribitur). |
| 10 | Getthaim, pro qua in Hebraeo positum 218 est AVITH, civitas Adad, qui quartus regnavit in terra Idumaea, quae nunc Gebalene dicitur. |
| 11 | Gesem, regio Aegypti, in qua habitavit Iacob cum liberis suis. |