Hieronymus, De situ et nominibus locorum Hebraicorum, LIBER., 30. DE NUMERIS ET DEUTERONOMIO.
| 1 | Ebrona, in deserto castra filiorum Israel. |
| 2 | Emath, quam transierunt exploratores, qui ab Iesu missi sunt. |
| 3 | Erma, ubi pars populi caesa est Israelis ab Amalec et Chananaeo, quem in Deuteronomio Amorrhaeum Scriptura vocat. |
| 4 | Esebon, civitas Seon regis Amorrhaeorum in terra Galaad: quae cum fuisset ante Moabitarum, ab Amorrhaeis belli iure possessa est. |
| 5 | Meminit huius Ieremias, Isaias quoque in visione contra Moab. |
| 6 | Porro nunc vocatur Esbus, urbs insignis Arabiae, in montibus qui sunt contra Iericho, viginti a Iordane millibus distans. |
| 7 | Fuit autem in tribu Ruben separata Levitis. |
| 8 | Edrai, ubi interfectus est Og rex Basan, gigas et potens, omnisque illius caesus exercitus. |
| 9 | Nunc autem est Adra insignis Arabiae civitas in vicesimo quarto lapide a Bostra. |
| 10 | Eleale, civitas Amorrhaeorum in Galaad, quae cecidit in sortem tribus Ruben. |
| 11 | 203 Meminit huius et Isaias in visione contra Moab, et Ieremias: sed et usque hodie villa grandis ostenditur in primo ab Esbus milliario. |
| 12 | Euna, quae est iuxta desertum Cades. |
| 13 | Ermon, mons Ermon, quem Phoenices cognominant Sanior: iam et supra positus. |