Hieronymus, De situ et nominibus locorum Hebraicorum, LIBER., 24. DE LIBRO GENESEOS.
| 1 | Dasem, urbs Assyriorum nobilis, quam exstruxit Assur, inter Niniven et Chalach. |
| 2 | Drys, id est, quercus Mambre, iuxta Chebron (quae usque ad aetatem infantiae meae, et Constantii regis imperium, terebinthus monstrabatur pervetus, et annos magnitudine indicans), sub qua habitavit Abraham. |
| 3 | (Miro autem cultu ab ethnicis habita est, et veluti quodam insigni numine consecrata.) Damascus, nobilis urbs Phoenicis. |
| 4 | Eodem autem vocabulo et Masec, ancillae Abraham filius, appellatus est. |
| 5 | (Porro Masec quid sibi velit, in libris Hebraicarum Quaestionum plenius disputavi: hic tantum interpretis sum functus officio, non quod ancillam Abrahae Masec nuncupatam, probem.) Dan, viculus est in quarto a Paneade milliario euntibus Tyrum: qui usque hodie sic vocatur, terminus Iudaeae provinciae contra septentrionem, de quo et Iordanis flumen erumpens. |
| 6 | (A loco sortitus est nomen: Ior, quippe ῥεῖθρον, id est fluvium, sive rivum Hebraei vocant.) Dannaba, civitas Balac, filii Beor regis Edom, post quem regnavit Iob (licet mihi videatur longe aliter). |
| 7 | et est usque hodie villa Dannaia, in octavo milliario Ἀρεοπόλεως pergentibus Arnonem; et altera Dannaba super montem Phogor in septimo lapide Esbus. |
| 8 | Dothaim, ubi invenit Ioseph fratres suos pecora pascentes, qui et usque hodie in duodecim milliario a Sebaste, contra Aquilonis plagam ostenditur. |